اقتصاد

مشاكل صادر الثروة الحيوانية، (1_2).

✍️ هادي ود البورت

      مشكلة صادر الثروة الحيوانية الجديدة

أصدرت الوزارة قرار بأنو تسليم المواشي يكون فوب على ظهر الباخرة في السودان ، عشان تتلافا عملية رجوع الصادر ، من وجهة نظري القرار ده عملياً وقف صادر الثروة الحيوانية ، لسبب بسيط المجازفة عالية جداً مافي “مستورد سعودي- وعلماً بأنو فيهم سودانيين بورق سعودي ” بجازف بحاجة زي دي لأنو عدم أرجاع الباخرة للسودان يعني خسارة القطيع كامل بالإضافة لقيمة إعدامه في المملكة ودي ممكن أكبر بكثير من قيمة الشحنة نفسها وما عارف اذا المملكة اصلا في حاجة زي دي

ممكن يكون القرار تكتيكي بهدف الحصول شروط جديدة من المملكة ، وهي مثلاً العودة للشرط الأول وهو” ” فحص المرض – في حالة أكتشاف حالة واحدة ايجابية يعني رجوع كامل الباخرة “، وبكده تتجاوز وزارة الثروة الحجر والتطعيم ، وتفحص القطيع بس من الحمى ،
لكن الحمى دي مستوطنة عندنا ما في شك وده راي اغلب البيطريين بالذات نهر النيل والجزيرة والشمالية والبحر الأحمر ، بيقولوا المرض ده لسه ما خش كردفان وهي غالب صادر الثروة الحيوانية . بالإضافة لطريقة الفحص المتبعة ممكن تفحص الحيوان المطعم على أنو مريض
…………..
في اسطوانة تانية حايمة بأنو في بواخر ما مطابقة.. و البواخرالبتكلمو عنها أغلبها مرخصة في المملكة يعني خاضعة للتفتيش البحري هناك ، بالذات الناس البتتكلم عن بواخر الجابري وهو عندو مجموعة بواخر البركة وهي 8 بواخر متنوعة الاحجام ، أغلبها حالياً مشت شغالة من ميناء بربرة في الصومال بتواصل مع عدد من الكباتن هناك وبتمشي أكتر من 10 عقد في الساعة و بتوصل البهائم بدون مشاكل وما عندهم رجوع رغم أنو المسافة خمسة اضعاف مسافة سواكن جدة
…..
اللجنة الأتكونت لمعرفة سـبب رجوع الصادر حا تجد صعوبة كبيرة في تحديد المشكلة وين بالزبط ، كل البتقال إجتهاد ساكت الفشل هو فشل منظومة متكاملة و فشل جهاز الدولة القائم بالموضوع ، ودي يمكن الأتكلمو عنها الكتيرين في الحوكمة والضبط المؤسسي وأعادة هيكلة جهاز الدولة حتى بينهم حمدوك بس مشكلتو ياها زاتها ما بقول الكلام بشكل واضح وبلغة دارجية الله يهديهو .
……..
عشان تفهم المشكلة وين نعيدها تاني : –

– يمكن يكون في مشكلة في نوع الفاكسين الجاي من كينيا لأنو الوزارة عندنا وأغلب البيطرين بقولوا فاكسين كينيا هو الأساس لانو ” حمى الوادي المتصدع دي محل أكتشافها اول مرة في كينيا محل الوادي ده ” – بينما ناس جدة بقولوا عايزين فاكسين جنوب افريقي و ده الكانت الشروط عليه مع المملكة الوقع عليها الوزير الفات
– في ناس بتقول منظومة الأستلام والمناولة والتحقين نفسها في المحاجر فيها مشكلة وفشل مزمن وعدم وجود أوعية مناسبة للحفظ قد يفسد الفاكسين بالتالي تقل فاعليتو
– في بعض الناس بحمّل المشكلة للمنظومة القائمة على الصادر واللجنة الأمنية والتأخير في الشحن لجدة ، بس لو عاينت براحة كده دي ما عندها علاقة بالمشكلة الحالية وهي “المناعة “، هم ممكن بتسببو في التعقيد والعراقيل وتقديم وتأخير شحنات بشبهات فساد ، يعني الموضوع ما يخلوا من تصفية وكيد تجاري – ده لو أخدتو كزول محايد
– في حاجة أخيرة ودي الواضح أنو الوزير المكلف عادل مايل ليها ” بي قرار فوب دي “و رمى المشكلة عليهم ، وهي أنو أختلاف الفحص هنا وفي جدة تقوم من هنا 80% وتصل جدة تبقى 30% ، ربما يكون نتيجة لمشكلة أو أختلاف معايير أو حظ ساكت في اخد العينيات في جدة ، لانو ناس جدة بشيلو 100 بس من كل الباخرة ويفحصوها ده الواقع هناك رغم القرار إنو يشيلو 100 من كل خمسة ألف راس والباخرة ممكن تكون شاحنة 20ألأف بدل يشيلو 400 منها بشيلو 100 بس كعينة. 

الراي شنو :-

أولاً : سليمان الجابري ده شغال في البهائم من ابوه أكتر من 50 سنة ، ويعود ليهم الفضل في نشر الضان السواكني بشكل واسع في السعودية ، سليمان الجابري ده هو هامور تجارة المواشي الحية وأكتر من 80% من المواشي في السعودية بتمر عبره حالياً .. من الصومال ومن استراليا ومن رومانيا ومن الحبشة ، المزاودة عليهو شغل بتاع ناس ما بتقرأ الصورة كاملة . ونكون واضحين سليمان الجابري في جدة بتعاملوا مع بضاعته بوعي زائد في الميناء وما عندو رجوع كتير
سليمان الجابري مالك أكبر الأحواش والمجازر في الشميسي بطاقة 2مليون رأس وأغلب استيراد الحج في المملكة بكون عبره ، وعندو مشاريع تسمين ممتازة بتضيف قيمة كبيرة على الخرفان ،
سبق الجابري ده قبل تلات سنوات قدم محجر ومشروع تسمين متكامل بحوالي 150 مليون ريال لحكومة الكيزان في سواكن عشان ينهي موضوع رجوع بواخرو زي ما بيقول ” وعلى فكرة الرجوع ده ما جديد بس زاد بعد اجراءات التطعيم الأخيرة “
أنا ما بعرفوا لكن أكون منون لو زول قرأ البوست ده يرسل لي تلفونو أو تلفون سوداني شغال معاهم عشان أفهم رصتهم شنو
………………………….
– تانياً : الراي يلغي قرار الوزير ده و يستمر الشحن وفقاُ للشروط الحالية وهي 40% مناعة وفي حالة قلّت في جدة كده ترجع الباخرة ، الباخرة الراجعة بتزيد التكلفة ما كتير الناس ما تنتحب وتشرط هدومة ساكت ” بتزيد اكل ونسبة ونفوق و4.5 دولار للشحن للمرة التانية أصلاً الرجوع مجاني و كل الرجع قبل كده تاني أتصدر ” لكن برضو ما يمنع نشتغل ضبط زيادة في المنظومة كلها .
لكن في حالة وقف الصادر نحن بنفقد سوق كبير وخسارة المنتجين برضها ما كويسة وبرضو في كميات كبيرة هسه مجحورة وماخدة فاكسين ، خلي الراجع يرجع الناس ما ننفعل ساكت ده ياهو وضعنا ، لكن ده ما يمنع مثلاً نتفاوض على شروط جديدة بداية من 1-1-2021 بحيث نعظم الفائدة ونقلل الرجوع ونضع خطط والمصدرين والمربين يرتبو من الآن
…………..
تالتاً : شاهدت مجموعة بهائم عند أحد الأصدقاء التجار في مكة مرفق صورها بعد شهر أو ست اسابيع من وصولها المملكة القيمة المضافة فيها كبيرة جدا ” ياخي أرتاحت في عمرها وأتضاعف حجم البهائم بتكلفة ما تزيد 120 ريال زي ما حسبها لي ….
فكرنا في مدينة أنعام متكاملة عشان نعمل القيمة المضافة دي عندنا برانا بالجابري أو بعيد منو ، المهم الصديق دكتور Ammar Suliman Abdelrhman ليهو تجربة كبيرة جداً في دراسات المحاجر ومدن الأنعام أجرى أتنين في مدن المملكة “وفقاً لرؤية محمد بن سلمان 2030″– بمبادرة وايجابية منو هو شغال لينا على واحدة للسودان وبنتناقش ونزبط فيها بنقدم عرضها في الايام الجاية ونرسل منها نسخة لمجلس الوزراء وزارة الثروة الحيوانية – البعرف الوزير عادل ده يكلموا يفك حظري عشان أرسلها ليهو واتساب. 
…..
يا خوانا بكرر نشتغل ونبطل الشـخصنة وتحميل الفشل لزول ونتجاوز حكاية الوزير فلان ما فاهم حاجة والوزير الفلاني فاشل .. الفشل ده مزمن بالجد دور الوزير فيهو بسيط

اظهر المزيد

مقالات ذات صلة